aankhen munde sab kuchh bhule kab se yunhi baiThe hain

āñkheñ mūñde sab kuchh bhūle kab se yūñhī baiThe haiñ

palkoñ pe kuchh ḳhvāb sajā.e jaage jaage so.e haiñ

kis se kyā rishta thā merā ab to ye bhī yaad nahīñ

reza-reza ā.īna hai bikhre bikhre chehre haiñ

apne ghar kī vīrānī kā ham kis se kyā haal kaheñ

suunā suunā darvāza hai ḳhālī ḳhālī kamre haiñ

tanhā.ī ke añdhiyāre meñ yādoñ kī mauhūm kiran

jaise raat kī peshānī par jhilmil jhilmil taare haiñ

tum se kyā batlā.eñ dil kā aalam kyā ho jaatā hai

biite mausam kī yādoñ ke āñchal jab lahrāte haiñ

ab ke baras bhī sāvan aa kar yūñhī biit gayā āḳhir

jalte haiñ ham andar andar aas ke panchhī pyāse haiñ

vaqt kī bhaTTī meñ tap tap kar ham ne ye jaanā 'betāb'

sachchā hai ik dard kā rishta baaqī rishte jhūTe haiñ

aankhen munde sab kuchh bhule kab se yunhi baiThe hain

palkon pe kuchh KHwab sajae jage jage soe hain

kis se kya rishta tha mera ab to ye bhi yaad nahin

reza-reza aaina hai bikhre bikhre chehre hain

apne ghar ki virani ka hum kis se kya haal kahen

suna suna darwaza hai KHali KHali kamre hain

tanhai ke andhiyare mein yaadon ki mauhum kiran

jaise raat ki peshani par jhilmil jhilmil tare hain

tum se kya batlaen dil ka aalam kya ho jata hai

bite mausam ki yaadon ke aanchal jab lahraate hain

ab ke baras bhi sawan aa kar yunhi bit gaya aaKHir

jalte hain hum andar andar aas ke panchhi pyase hain

waqt ki bhaTTi mein tap tap kar hum ne ye jaana 'betab'

sachcha hai ek dard ka rishta baqi rishte jhuTe hain