aankhon ke kanwal lab ke chaman-zar bahut the

āñkhoñ ke kañval lab ke chaman-zār bahut the

dīvāne magar sair se bezār bahut the

ham log kaḌī dhuup ke shaidā.ī the varna

yuuñ sar ko chhupāne dar-o-dīvār bahut the

har shaḳhs ke chehre pe ka.ī chehre the chaspāñ

tujh jaise tire shahr meñ ayyār bahut the

TuuTā huā pul ret kī dīvār havā tez

lagtā hai ki bastī meñ gunahgār bahut the

alfāz adā kartī rahīñ boltī āñkheñ

chup rah ke bhī vo mā.il-e-guftār bahut the

āñkhoñ ke darīchoñ meñ hayā jaag rahī thī

so.e the kuchh aise ki vo bedār bahut the

vo shaḳhs to har gaam pe detā rahā dhoke

tum phir bhī 'naved' us ke parastār bahut the

aankhon ke kanwal lab ke chaman-zar bahut the

diwane magar sair se bezar bahut the

hum log kaDi dhup ke shaidai the warna

yun sar ko chhupane dar-o-diwar bahut the

har shaKHs ke chehre pe kai chehre the chaspan

tujh jaise tere shahr mein ayyar bahut the

TuTa hua pul ret ki diwar hawa tez

lagta hai ki basti mein gunahgar bahut the

alfaz ada karti rahin bolti aankhen

chup rah ke bhi wo mail-e-guftar bahut the

aankhon ke darichon mein haya jag rahi thi

soe the kuchh aise ki wo bedar bahut the

wo shaKHs to har gam pe deta raha dhoke

tum phir bhi 'nawed' us ke parastar bahut the