aankhon ko aansuon ki zarurat hai aaj bhi

āñkhoñ ko āñsuoñ kī zarūrat hai aaj bhī

jitnī bhī rah ga.ī hai mohabbat hai aaj bhī

sāzish kī ek shaam bujhā.e ga.e the ham

lekin diyoñ ko taaq se nisbat hai aaj bhī

kuchh bhī sañbhāl paa.e na ham tang-dast log

ye ḳhāk-dān-e-jism hī daulat hai aaj bhī

aise namāziyoñ kā vuzū bhī na kar qubūl

yā-rab diloñ meñ kitnī kudūrat hai aaj bhī

lekin tumhāre husn kā ne'mul-badal kahāñ

dil meñ to be-hisāb mohabbat hai aaj bhī

tā'līm de rahā huuñ mohabbat kī jism ko

mushkil ye hai ki ruuh kī sohbat hai aaj bhī

insān ban ke baiThā hai har ādmī-numā

duniyā pe ik ḳhayāl kī dahshat hai aaj bhī

aankhon ko aansuon ki zarurat hai aaj bhi

jitni bhi rah gai hai mohabbat hai aaj bhi

sazish ki ek sham bujhae gae the hum

lekin diyon ko taq se nisbat hai aaj bhi

kuchh bhi sanbhaal pae na hum tang-dast log

ye KHak-dan-e-jism hi daulat hai aaj bhi

aise namaziyon ka wuzu bhi na kar qubul

ya-rab dilon mein kitni kudurat hai aaj bhi

lekin tumhaare husn ka ne'mul-badal kahan

dil mein to be-hisab mohabbat hai aaj bhi

ta'lim de raha hun mohabbat ki jism ko

mushkil ye hai ki ruh ki sohbat hai aaj bhi

insan ban ke baiTha hai har aadmi-numa

duniya pe ek KHayal ki dahshat hai aaj bhi