aankhon ko humne baam par bil-ehtiram rakh diya

āñkhoñ ko ham ne baam par bil-ehtirām rakh diyā

aur us hasīñ kī raah meñ dil gām-gām rakh diyā

maiñ to yahī huuñ sochtā rakh kar mujhe hisār meñ

siine meñ mere kis liye dil be-lagām rakh diyā

jab ham siyāh raat se kirneñ na kar sake kashīd

to ham ne shab kā naam hī sub.h-e-davām rakh diyā

TuuTā huā maiñ ek bhī taarā na us ko de sakā

us ne to mere sāmne māh-e-tamām rakh diyā

dahlīz-e-bait-e-lam-yazal par hai rakhī huī jabīñ

dil rū-ba-rū-e-rauza-e-ḳhair-ul-anām rakh diyā

maiñ ne to apnī zaat kī kul kā.enāt kā tire

dast-e-savāb-dīd par saarā nizām rakh diyā

mujh tak bhī daur-e-jām to aaya magar ye kyā huā

saaqī ne merī dastaras se duur jaam rakh diyā

us ne to rad hī kar diye mere mubālġhe sabhī

goyā ki ek buuñd kā 'sāgar' hī naam rakh diyā

aankhon ko hum ne baam par bil-ehtiram rakh diya

aur us hasin ki rah mein dil gam-gam rakh diya

main to yahi hun sochta rakh kar mujhe hisar mein

sine mein mere kis liye dil be-lagam rakh diya

jab hum siyah raat se kirnen na kar sake kashid

to hum ne shab ka nam hi subh-e-dawam rakh diya

TuTa hua main ek bhi tara na us ko de saka

us ne to mere samne mah-e-tamam rakh diya

dahliz-e-bait-e-lam-yazal par hai rakhi hui jabin

dil ru-ba-ru-e-rauza-e-KHair-ul-anam rakh diya

main ne to apni zat ki kul kaenat ka tere

dast-e-sawab-did par sara nizam rakh diya

mujh tak bhi daur-e-jam to aaya magar ye kya hua

saqi ne meri dastaras se dur jam rakh diya

us ne to rad hi kar diye mere mubaalghe sabhi

goya ki ek bund ka 'sagar' hi nam rakh diya