aankhon mein aansuon ko ubharne nahin diya

āñkhoñ meñ āñsuoñ ko ubharne nahīñ diyā

miTTī meñ motiyoñ ko bikharne nahīñ diyā

jis raah par paḌe the tire paañv ke nishāñ

is raah se kisī ko guzarne nahīñ diyā

chāhā to chāhatoñ kī hadoñ se guzar ga.e

nashsha mohabbatoñ kā utarne nahīñ diyā

har baar hai nayā tire milne kā zā.iqa

aisā samar kisī bhī shajar ne nahīñ diyā

ye hijr hai to is kā faqat vasl hai ilaaj

ham ne ye zaḳhm-e-vaqt ko bharne nahīñ diyā

itne baḌe jahān meñ jā.egā tū kahāñ

is ik ḳhayāl ne mujhe marne nahīñ diyā

sāhil dikhā.ī de to rahā thā bahut qarīb

kashtī ko rāsta hī bhañvar ne nahīñ diyā

jitnā sakūñ milā hai tire saath raah meñ

itnā sukūn to mujhe ghar ne nahīñ diyā

is ne hañsī hañsī meñ mohabbat kī baat kī

maiñ ne 'adīm' us ko mukarne nahīñ diyā

aankhon mein aansuon ko ubharne nahin diya

miTTi mein motiyon ko bikharne nahin diya

jis rah par paDe the tere panw ke nishan

is rah se kisi ko guzarne nahin diya

chaha to chahaton ki hadon se guzar gae

nashsha mohabbaton ka utarne nahin diya

har bar hai naya tere milne ka zaiqa

aisa samar kisi bhi shajar ne nahin diya

ye hijr hai to is ka faqat wasl hai ilaj

hum ne ye zaKHm-e-waqt ko bharne nahin diya

itne baDe jahan mein jaega tu kahan

is ek KHayal ne mujhe marne nahin diya

sahil dikhai de to raha tha bahut qarib

kashti ko rasta hi bhanwar ne nahin diya

jitna sakun mila hai tere sath rah mein

itna sukun to mujhe ghar ne nahin diya

is ne hansi hansi mein mohabbat ki baat ki

main ne 'adim' us ko mukarne nahin diya