aankhon mein ashk dil mein kyunkar gila na aae

āñkhoñ meñ ashk dil meñ kyūñkar gila na aa.e

hālat pe merī mere apne hī muskurā.e

chāhat kī rah-guzar meñ aksar hī maiñ ne paa.e

dil kī zamīñ ke uupar māyūsiyoñ ke saa.e

kāñTe chubhone vaalo ye vo badan hai jis ne

sūraj bhī āzmāyā sho'le bhī āzmā.e

apne hī dostoñ ne jitne diye the mujh ko

sab zaḳhm sil ga.e haiñ koī aa.e dil dukhā.e

hasrat hī rah ga.ī hai mālik mirī jahāñ meñ

koī to ho jo mujh ko chāhat se bhī bulā.e

logoñ ne bebasī meñ dekhā jab aa ke mujh ko

kuchh ḳhuub muskurā.e kuchh muskurā na paa.e

maiñ ne ye Thaan lī hai sah lūñgā hañs ke saare

taqdīr ab ke mujh par jitne sitam bhī Dhaa.e

aankhon mein ashk dil mein kyunkar gila na aae

haalat pe meri mere apne hi muskurae

chahat ki rah-guzar mein aksar hi main ne pae

dil ki zamin ke upar mayusiyon ke sae

kanTe chubhone walo ye wo badan hai jis ne

suraj bhi aazmaya sho'le bhi aazmae

apne hi doston ne jitne diye the mujh ko

sab zaKHm sil gae hain koi aae dil dukhae

hasrat hi rah gai hai malik meri jahan mein

koi to ho jo mujh ko chahat se bhi bulae

logon ne bebasi mein dekha jab aa ke mujh ko

kuchh KHub muskurae kuchh muskura na pae

main ne ye Than li hai sah lunga hans ke sare

taqdir ab ke mujh par jitne sitam bhi Dhae