aankhon mein bas gaya koi banhon se dur hai

āñkhoñ meñ bas gayā koī bāñhoñ se duur hai

chāhā hai chāñd ko yahī apnā qusūr hai

dozaḳh meñ jī rahā huuñ isī ek aas pe

jannat ko koī rāsta jaatā zarūr hai

maiñ laḌkhaḌā rahā huuñ sadāqat kī raah pe

is ruuh pe abhī bhī badan kā surūr hai

ye raushnī ke daaġh ujāle to haiñ nahīñ

qāsir sā āsmāñ ke sitāroñ kā nuur hai

ab kyā batā.eñ tum ko sifat dil ke daaġh kī

ham muflisoñ ke paas koī koh-e-nūr hai

bhagvān ban gayā hai mirā yaar aaj kal

rahtā hai saath phir bhī lage duur duur hai

kyuuñ ishq kī karāh gadāgar kī aah ho

kyā husn kā ġhurūr ḳhudā.ī kā nuur hai

aankhon mein bas gaya koi banhon se dur hai

chaha hai chand ko yahi apna qusur hai

dozaKH mein ji raha hun isi ek aas pe

jannat ko koi rasta jata zarur hai

main laDkhaDa raha hun sadaqat ki rah pe

is ruh pe abhi bhi badan ka surur hai

ye raushni ke dagh ujale to hain nahin

qasir sa aasman ke sitaron ka nur hai

ab kya bataen tum ko sifat dil ke dagh ki

hum muflison ke pas koi koh-e-nur hai

bhagwan ban gaya hai mera yar aaj kal

rahta hai sath phir bhi lage dur dur hai

kyun ishq ki karah gadagar ki aah ho

kya husn ka ghurur KHudai ka nur hai