aankhon mein ek KHwab tha wo bhi pighal gaya

āñkhoñ meñ ek ḳhvāb thā vo bhī pighal gayā

tum kyā ga.e ki shahr kā mausam badal gayā

jaltā rahā havāoñ ke aage mirā charāġh

ik sāneha thā maañ kī duāoñ se Tal gayā

kyā zabt-e-ġham kī aag hai mujh meñ lagī huī

mere qarīb se jo gayā vo bhī jal gayā

chup-chāp the to koī hameñ pūchhtā na thā

āñdhī kā zor dekh ke dariyā sañbhal gayā

ab sochne ke vāste kuchh bhī nahīñ rahā

us kā ḳhayāl jo mire dil se nikal gayā

ham apnī baat kah na sake ai ‘qamar-surūr'

jo mājrā thā dard kā ashkoñ meñ Dhal gayā

aankhon mein ek KHwab tha wo bhi pighal gaya

tum kya gae ki shahr ka mausam badal gaya

jalta raha hawaon ke aage mera charagh

ek saneha tha man ki duaon se Tal gaya

kya zabt-e-gham ki aag hai mujh mein lagi hui

mere qarib se jo gaya wo bhi jal gaya

chup-chap the to koi hamein puchhta na tha

aandhi ka zor dekh ke dariya sanbhal gaya

ab sochne ke waste kuchh bhi nahin raha

us ka KHayal jo mere dil se nikal gaya

hum apni baat kah na sake ai ‘qamar-surur'

jo majra tha dard ka ashkon mein Dhal gaya