aankhon mein hijr chehre pe gham ki shikan to hai

āñkhoñ meñ hijr chehre pe ġham kī shikan to hai

mujh meñ sajī huī magar ik anjuman to hai

sāñsoñ ko us kī yaad se nisbat hai aaj bhī

mujh meñ kisī bhī taur sahī bāñkpan to hai

har sub.h chahchahātī hai chiḌiyā muñDer par

vīrān ghar meñ aas kī koī kiran to hai

mumkin hai us kā vasl mayassar na ho mujhe

lekin is aarzū se mirā ghar chaman to hai

har vaqt mahv-e-raqs hai chehra ḳhayāl meñ

be-rabt zindagī hai magar dil magan to hai

har lamha us se rahtā huuñ masrūf-e-guftugū

kahne ko mere saath koī ham-suḳhan to hai

mere liye ye baat hī kaafī hai ai 'ravish'

kuchh bhī ho mujh meñ ab bhī mirā apnā-pan to hai

aankhon mein hijr chehre pe gham ki shikan to hai

mujh mein saji hui magar ek anjuman to hai

sanson ko us ki yaad se nisbat hai aaj bhi

mujh mein kisi bhi taur sahi bankpan to hai

har subh chahchahati hai chiDiya munDer par

viran ghar mein aas ki koi kiran to hai

mumkin hai us ka wasl mayassar na ho mujhe

lekin is aarzu se mera ghar chaman to hai

har waqt mahw-e-raqs hai chehra KHayal mein

be-rabt zindagi hai magar dil magan to hai

har lamha us se rahta hun masruf-e-guftugu

kahne ko mere sath koi ham-suKHan to hai

mere liye ye baat hi kafi hai ai 'rawish'

kuchh bhi ho mujh mein ab bhi mera apna-pan to hai