aankhon mein kahan wo binai didar ki baaten karte ho

āñkhoñ meñ kahāñ vo bīnā.ī dīdār kī bāteñ karte ho

kaisā jalva kis kā jalva bekār kī bāteñ karte ho

ai rāh-e-vafā ke dīvānoñ lo zabt se thoḌā kaam yahāñ

do chaar qadam chalne par kyoñ tum ḳhaar kī bāteñ karte ho

ye bhāv-tāv kī jagah nahīñ yaañ haañ haañ karnī paḌtī hai

kūche meñ mohabbat ke yaaro bāzār kī bāteñ karte ho

iqrār jahāñ nazreñ kar deñ kyā kaam vahāñ phir lafzoñ kā

chhoḌo bhī jaane do kyoñ ab guftār kī bāteñ karte ho

tūfānoñ se Takrāne kā rakhte haiñ saroñ meñ jo saudā

tum aise junūnī logoñ se mañjhdār kī bāteñ karte ho

ādāb-e-mohabbat se tum bhī haañ ḳhuub shanāsā ho hī ga.e

sab jiit kī bāteñ karte haiñ tum haar kī bāteñ karte ho

ab sehn-e-chaman meñ mātam hai rote haiñ gale mil mil kar sab

is daur-e-ḳhizāñ meñ nādāno gulzār kī bāteñ karte ho

shāyad yuuñ hī tum se sab apne rahte haiñ muzammil' bad-zan se

is daur-e-kashākash meñ bhī tum kirdār kī bāteñ karte ho

aankhon mein kahan wo binai didar ki baaten karte ho

kaisa jalwa kis ka jalwa bekar ki baaten karte ho

ai rah-e-wafa ke diwanon lo zabt se thoDa kaam yahan

do chaar qadam chalne par kyon tum KHar ki baaten karte ho

ye bhaw-taw ki jagah nahin yan han han karni paDti hai

kuche mein mohabbat ke yaro bazar ki baaten karte ho

iqrar jahan nazren kar den kya kaam wahan phir lafzon ka

chhoDo bhi jaane do kyon ab guftar ki baaten karte ho

tufanon se Takrane ka rakhte hain saron mein jo sauda

tum aise jununi logon se manjhdar ki baaten karte ho

aadab-e-mohabbat se tum bhi han KHub shanasa ho hi gae

sab jit ki baaten karte hain tum haar ki baaten karte ho

ab sehn-e-chaman mein matam hai rote hain gale mil mil kar sab

is daur-e-KHizan mein nadano gulzar ki baaten karte ho

shayad yun hi tum se sab apne rahte hain muzammil' bad-zan se

is daur-e-kashakash mein bhi tum kirdar ki baaten karte ho