aankhon mein kahin uski bhi tufan to nahin tha

āñkhoñ meñ kahīñ us kī bhī tūfāñ to nahīñ thā

vo mujh se judā ho ke pashemāñ to nahīñ thā

kyuuñ us ne na kī mujh se sar-e-bazm koī baat

maiñ sañg-e-malāmat se gurezāñ to nahīñ thā

kyuuñ rāsta dekhā kiyā us kā maiñ sar-e-shām

be-dard kā mujh se koī paimāñ to nahīñ thā

thī aag bhī terī hī tarah hosh kī dushman

varna mujhe jal marne kā armāñ to nahīñ thā

thā dil bhī kabhī shahr-e-tamannā meñ mumāsil

ye qarya hamesha se bayābāñ to nahīñ thā

kyuuñ us ne mujhe azmat-e-qur.āñ kī qasam dī

vo rahzan-e-īmān musalmāñ to nahīñ thā

kyuuñ mujh se tavaqqo.a thī use jāh-o-hasham kī

maiñ banda-e-nādār sulaimāñ to nahīñ thā

tūfān-e-alam kyuuñ mujhe sāhil pe utārā

maiñ shor-e-talātum se hirāsāñ to nahīñ thā

shab-bhar mirī palkoñ meñ damakte rahe taare

kal raat yahāñ jashn-e-charāġhāñ to nahīñ thā

kahte haiñ ki hai 'arsh' nigūñ pā-e-nabī par

aisā vo koī sāhab-e-īmāñ to nahīñ thā

aankhon mein kahin us ki bhi tufan to nahin tha

wo mujh se juda ho ke pasheman to nahin tha

kyun us ne na ki mujh se sar-e-bazm koi baat

main sang-e-malamat se gurezan to nahin tha

kyun rasta dekha kiya us ka main sar-e-sham

be-dard ka mujh se koi paiman to nahin tha

thi aag bhi teri hi tarah hosh ki dushman

warna mujhe jal marne ka arman to nahin tha

tha dil bhi kabhi shahr-e-tamanna mein mumasil

ye qarya hamesha se bayaban to nahin tha

kyun us ne mujhe azmat-e-quran ki qasam di

wo rahzan-e-iman musalman to nahin tha

kyun mujh se tawaqqoa thi use jah-o-hasham ki

main banda-e-nadar sulaiman to nahin tha

tufan-e-alam kyun mujhe sahil pe utara

main shor-e-talatum se hirasan to nahin tha

shab-bhar meri palkon mein damakte rahe tare

kal raat yahan jashn-e-charaghan to nahin tha

kahte hain ki hai 'arsh' nigun pa-e-nabi par

aisa wo koi sahab-e-iman to nahin tha