aankhon mein KHwab rakh diye tabir chhin li

āñkhoñ meñ ḳhvāb rakh diye ta.abīr chhīn lī

us ne ḳhitāb baḳhsh ke jāgīr chhīn lī

ġham ye nahīñ ki baḳht ne barbād kar diyā

ġham hai to ye ki ḳhvāhish-e-ta.amīr chhīn lī

dastār-e-maslahat to yuuñ bhī sar pe bojh thī

achchhā kiyā ki tum ne ye tauqīr chhīn lī

ye kis kī bad-duā kī hai tāsīr yā-ḳhudā

jis ne mirī duāoñ se tāsīr chhīn lī

qadr-o-qazā kā zikr kuchh is tarah se kiyā

vaa.iz ne nok-e-nāḳhun-e-tadbīr chhīn lī

shohrat milī thī jur.at-e-taqrīr se jise

shohrat ne us se jur.at-e-taqrīr chhīn lī

but ban gayā to us kī namī ḳhatm ho ga.ī

bhaktoñ ne us kī ḳhaak se iksīr chhīn lī

andesha-e-itāb se yaar aur Dar ga.e

qātil se ham ne baḌh ke jo shamshīr chhīn lī

be-nutq thī to kahtī thī kyā kyā na dāstāñ

goyā.ī ne to hairat-e-tasvīr chhīn lī

rahne lagā hai vo baḌā chup chup sā in dinoñ

'arshad' se kis ne shoḳhī-e-taqrīr chhīn lī

aankhon mein KHwab rakh diye tabir chhin li

us ne KHitab baKHsh ke jagir chhin li

gham ye nahin ki baKHt ne barbaad kar diya

gham hai to ye ki KHwahish-e-tamir chhin li

dastar-e-maslahat to yun bhi sar pe bojh thi

achchha kiya ki tum ne ye tauqir chhin li

ye kis ki bad-dua ki hai tasir ya-KHuda

jis ne meri duaon se tasir chhin li

qadr-o-qaza ka zikr kuchh is tarah se kiya

waiz ne nok-e-naKHun-e-tadbir chhin li

shohrat mili thi jurat-e-taqrir se jise

shohrat ne us se jurat-e-taqrir chhin li

but ban gaya to us ki nami KHatm ho gai

bhakton ne us ki KHak se iksir chhin li

andesha-e-itab se yar aur Dar gae

qatil se hum ne baDh ke jo shamshir chhin li

be-nutq thi to kahti thi kya kya na dastan

goyai ne to hairat-e-taswir chhin li

rahne laga hai wo baDa chup chup sa in dinon

'arshad' se kis ne shoKHi-e-taqrir chhin li