aankhon mein sare karb ke manzar sameT lae

āñkhoñ meñ saare karb ke manzar sameT laa.e

duniyā kā zahr apne hī andar sameT laa.e

ghar meñ utartī shaam se ghabrā ga.e the ham

chhat par chaḌhe to dhuup ke kuchh par sameT laa.e

sūraj thā tez-gām to ham ne bhī ye kiyā

parchhā.iyoñ ko qad ke barābar sameT laa.e

yalġhār baḌh rahī thī savere kī is liye

sālār-e-vaqt raat ke lashkar sameT laa.e

tark-e-ta'alluqāt kī be-hurmatī na ho

rishtoñ ko apne soch-samajh kar sameT laa.e

māyūsiyoñ ko ik na.ī hijrat ke vāste

ham qāfile kī aañkh bachā kar sameT laa.e

aankhon mein sare karb ke manzar sameT lae

duniya ka zahr apne hi andar sameT lae

ghar mein utarti sham se ghabra gae the hum

chhat par chaDhe to dhup ke kuchh par sameT lae

suraj tha tez-gam to hum ne bhi ye kiya

parchhaiyon ko qad ke barabar sameT lae

yalghaar baDh rahi thi sawere ki is liye

salar-e-waqt raat ke lashkar sameT lae

tark-e-ta'alluqat ki be-hurmati na ho

rishton ko apne soch-samajh kar sameT lae

mayusiyon ko ek nai hijrat ke waste

hum qafile ki aankh bacha kar sameT lae