aankhon par aah yas ka parda sa paD gaya

āñkhoñ par aah yaas kā parda sā paḌ gayā

duniyā ujaḌ ga.ī ki mirā dil ujaḌ gayā

allāh kaisā tafraqa marne se paḌ gayā

maiñ ek saath saare jahāñ se bichhaḌ gayā

ab soz-e-dil ke naaz uThā.e na jā.eñge

aañsū jahāñ girā vahīñ nāsūr paḌ gayā

mahshar isī kā naam hai parvā nahīñ unheñ

duniyā bigaḌ ga.ī ki gharauñdā bigaḌ gayā

marnā paḌā kise tire zauq-e-gunāh se

ai dil ḳhabar bhī hai koī ġhairat se gaḌ gayā

āñkhoñ meñ ab to aur bhī phirtā hai āshiyāñ

haañ sun liyā bahār kā ḳhema ukhaḌ gayā

ab āsmān chiir ke niklegā kis kā dil

tār-e-ḳhayāl meñ koī mujh ko jakaḌ gayā

vaqt-e-vidā.a dil pe kuchh aisī guzar ga.ī

ab tak ḳhabar nahīñ ki maiñ kis se bichhaḌ gayā

ai nāḳhun-e-fanā tirī shoḳhī ke maiñ nisār

qudrat ne jo kiyā thā vo baḳhiya ukhaḌ gayā

vo koī aur chiiz hai āshiq kā dil nahīñ

jis dil meñ ban ke naqsh-e-tamannā bigaḌ gayā

hasrat se dekhtā hī rahā pīr-e-mai-kada

aur josh-e-mai meñ shīsha se paimāna laḌ gayā

qudrat ne haath chuum liye us ke vajd meñ

jo naqsh-e-kā.enāt par ā.īna jaḌ gayā

duniyā karāhne kī sadā ban ke rah ga.ī

maiñ dil ko marte dekh kar aafat meñ paḌ gayā

aankhon par aah yas ka parda sa paD gaya

duniya ujaD gai ki mera dil ujaD gaya

allah kaisa tafraqa marne se paD gaya

main ek sath sare jahan se bichhaD gaya

ab soz-e-dil ke naz uThae na jaenge

aansu jahan gira wahin nasur paD gaya

mahshar isi ka nam hai parwa nahin unhen

duniya bigaD gai ki gharaunda bigaD gaya

marna paDa kise tere zauq-e-gunah se

ai dil KHabar bhi hai koi ghairat se gaD gaya

aankhon mein ab to aur bhi phirta hai aashiyan

han sun liya bahaar ka KHema ukhaD gaya

ab aasman chir ke niklega kis ka dil

tar-e-KHayal mein koi mujh ko jakaD gaya

waqt-e-widaa dil pe kuchh aisi guzar gai

ab tak KHabar nahin ki main kis se bichhaD gaya

ai naKHun-e-fana teri shoKHi ke main nisar

qudrat ne jo kiya tha wo baKHiya ukhaD gaya

wo koi aur chiz hai aashiq ka dil nahin

jis dil mein ban ke naqsh-e-tamanna bigaD gaya

hasrat se dekhta hi raha pir-e-mai-kada

aur josh-e-mai mein shisha se paimana laD gaya

qudrat ne hath chum liye us ke wajd mein

jo naqsh-e-kaenat par aaina jaD gaya

duniya karahne ki sada ban ke rah gai

main dil ko marte dekh kar aafat mein paD gaya