aankhon pe tez dhup ka koi asar nahin

āñkhoñ pe tez dhuup kā koī asar nahīñ

ham saarī shab guzār chuke haiñ magar nahīñ

ham apnī apnī soch ke qaa.il to ho ga.e

par soch vo ki jis ke abhī bāl-o-par nahīñ

is tishnagī kā zikr koī kis se ab kare

sahrā meñ duur duur talak koī dar nahīñ

har shaḳhs chāhtā hai havāoñ pe iḳhtiyār

lekin sabhī ke haath lage vo hunar nahīñ

phirtā hai saath saath hamāre tamām 'umr

lagtā hai āsmān kā ab koī ghar nahīñ

le aa.ī aise moḌ pe ab zindagī jahāñ

marne kā intizār hai marne kā Dar nahīñ

aankhon pe tez dhup ka koi asar nahin

hum sari shab guzar chuke hain magar nahin

hum apni apni soch ke qail to ho gae

par soch wo ki jis ke abhi baal-o-par nahin

is tishnagi ka zikr koi kis se ab kare

sahra mein dur dur talak koi dar nahin

har shaKHs chahta hai hawaon pe iKHtiyar

lekin sabhi ke hath lage wo hunar nahin

phirta hai sath sath hamare tamam 'umr

lagta hai aasman ka ab koi ghar nahin

le aai aise moD pe ab zindagi jahan

marne ka intizar hai marne ka Dar nahin