aankhon se aansuon ki nishani miTa ke dekh

āñkhoñ se āñsuoñ kī nishānī miTā ke dekh

muskān kī rubber ko zarā aazmā ke dekh

dīvāroñ ke bhī kaan haiñ ye boltī bhī haiñ

ek baar in ko raaz to koī batā ke dekh

rishte baneñge phir na.e lamhoñ se bhī tire

maazī kī talḳhiyoñ se marāsim ghaTā ke dekh

kuchh yuuñ udāsiyoñ ko ġham-e-dil se duur kar

nazreñ milā ġhamoñ se zarā muskurā ke dekh

koī nahīñ hai duur talak duuñ kise sadā

aisā lage agar to ḳhudā ko bulā ke dekh

dil ke liye hai achchhā ḳhayālī-pulāv bhī

kyā harj hai kabhī to use bhī pakā ke dekh

achchhā lagegā tujh ko tirā saath bhī 'sifar'

kuchh pal to ḳhud ke saath bhī ik din bitā ke dekh

aankhon se aansuon ki nishani miTa ke dekh

muskan ki rubber ko zara aazma ke dekh

diwaron ke bhi kan hain ye bolti bhi hain

ek bar in ko raaz to koi bata ke dekh

rishte banenge phir nae lamhon se bhi tere

mazi ki talKHiyon se marasim ghaTa ke dekh

kuchh yun udasiyon ko gham-e-dil se dur kar

nazren mila ghamon se zara muskura ke dekh

koi nahin hai dur talak dun kise sada

aisa lage agar to KHuda ko bula ke dekh

dil ke liye hai achchha KHayali-pulaw bhi

kya harj hai kabhi to use bhi paka ke dekh

achchha lagega tujh ko tera sath bhi 'sifar'

kuchh pal to KHud ke sath bhi ek din bita ke dekh