aankhon se ho ke dil mein wo surat utar gai

āñkhoñ se ho ke dil meñ vo sūrat utar ga.ī

mumkin na thī jo baat vahī baat kar ga.ī

kyā jaane kyā vo ġham thā jo har dil ko chhū gayā

jo aañkh bhī ga.ī tirī mahfil se tar ga.ī

merā hī āshiyāñ thā girīñ jis pe bijliyāñ

merī hī ḳhaak thī jo havā meñ bikhar ga.ī

Tiktī na thī kisī pe zamāne meñ aaj tak

dekhā tumheñ to phir na kisī par nazar ga.ī

jaate hue jahāñ se yahī sochte haiñ log

haa.e vo zindagī vo javānī kidhar ga.ī

dāman chhuḌā ke aap chale to ga.e magar

ham kyā kaheñ jo dil pe hamāre guzar ga.ī

ro.e shab-e-firāq ham itnā ki ai 'kañval'

dāman nichoḌtī huī apnā sahar ga.ī

aankhon se ho ke dil mein wo surat utar gai

mumkin na thi jo baat wahi baat kar gai

kya jaane kya wo gham tha jo har dil ko chhu gaya

jo aankh bhi gai teri mahfil se tar gai

mera hi aashiyan tha girin jis pe bijliyan

meri hi KHak thi jo hawa mein bikhar gai

Tikti na thi kisi pe zamane mein aaj tak

dekha tumhein to phir na kisi par nazar gai

jate hue jahan se yahi sochte hain log

hae wo zindagi wo jawani kidhar gai

daman chhuDa ke aap chale to gae magar

hum kya kahen jo dil pe hamare guzar gai

roe shab-e-firaq hum itna ki ai 'kanwal'

daman nichoDti hui apna sahar gai