aankhon se ho rahi hai jo barsat hi to hai

āñkhoñ se ho rahī hai jo barsāt hī to hai

mujh par kisī kī chashm-e-ināyāt hī to hai

jo rafta-rafta utrā hai dil ke makān meñ

koī nahīñ vo sirf tirī zaat hī to hai

sab pesh aa rahe haiñ ḳhulūs-o-vafā ke saath

ye zindagī kī merī baḌī baat hī to hai

toḌā na ham ne sabr kā dāman isī liye

lambī hai ġham kī raat magar raat hī to hai

ye jhiil ye pahāḌ ye jharne ye ābshār

jo kuchh hai sab ḳhudā kī ināyāt hī to hai

be-iḳhtiyārī aur ye be-tābiyāñ 'hirā'

ye sab mohabbatoñ kī shurūāt hī to hai

aankhon se ho rahi hai jo barsat hi to hai

mujh par kisi ki chashm-e-inayat hi to hai

jo rafta-rafta utra hai dil ke makan mein

koi nahin wo sirf teri zat hi to hai

sab pesh aa rahe hain KHulus-o-wafa ke sath

ye zindagi ki meri baDi baat hi to hai

toDa na hum ne sabr ka daman isi liye

lambi hai gham ki raat magar raat hi to hai

ye jhil ye pahaD ye jharne ye aabshaar

jo kuchh hai sab KHuda ki inayat hi to hai

be-iKHtiyari aur ye be-tabiyan 'hira'

ye sab mohabbaton ki shuruat hi to hai