aankhon se KHun apne ye kahta nahin na jae

āñkhoñ se ḳhuun apne ye kahtā nahīñ na jaa.e

par saath us ke lipTā huā dil kahīñ na jaa.e

itnī to chāhiye tujhe pās-e-shikasta-dil

jo aave tere yaañ so vo andohgīñ na jaa.e

sabr-o-qarār-o-hosh-o-ḳhirad sab ke sab ye jaa.eñ

par dāġh-e-ishq siine se ai ham-nashīñ na jaa.e

dair-o-haram meñ jā ke jo chāhe phir aa sake

par aave jo galī meñ tirī vo kahīñ na jaa.e

ham girya-nāk haiñ ye sadā se hai aib-posh

āñkhoñ se duur apne kahīñ āstīñ na jaa.e

hai pāra-e-aqīq jigar dekhiyo kahīñ

ai chashm tere haath se aisā nagīñ na jaa.e

nikle na jaan tan se 'hasan' kī to tab talak

jab tak tū us ke sar pe dam-e-vāpsīñ na jaa.e

aankhon se KHun apne ye kahta nahin na jae

par sath us ke lipTa hua dil kahin na jae

itni to chahiye tujhe pas-e-shikasta-dil

jo aawe tere yan so wo andohgin na jae

sabr-o-qarar-o-hosh-o-KHirad sab ke sab ye jaen

par dagh-e-ishq sine se ai ham-nashin na jae

dair-o-haram mein ja ke jo chahe phir aa sake

par aawe jo gali mein teri wo kahin na jae

hum girya-nak hain ye sada se hai aib-posh

aankhon se dur apne kahin aastin na jae

hai para-e-aqiq jigar dekhiyo kahin

ai chashm tere hath se aisa nagin na jae

nikle na jaan tan se 'hasan' ki to tab talak

jab tak tu us ke sar pe dam-e-wapsin na jae