aankhon se uski yaad ka haala nahin gaya

āñkhoñ se us kī yaad kā haala nahīñ gayā

kāñTā ye apne dil se nikālā nahīñ gayā

ġham khaa.e āñsuoñ ko piyā hoñT sī liye

koī bhī hukm aap kā Taalā nahīñ gayā

har chiiz kā.enāt kī raushan huī magar

zehn-e-bashar se hirs kā jaalā nahīñ gayā

dīvān-gān-e-husn kī ik bhiiḌ thī vahāñ

maiñ us kī anjuman meñ nirālā nahīñ gayā

vo ek baar aa.e the dahlīz pe mirī

phir is ke baa'd ghar se ujālā nahīñ gayā

har shaḳhs ke laboñ pe haiñ us kī hikāyateñ

zālim se apnā husn sañbhālā nahīñ gayā

āsā.ishoñ pe 'rāhī' maiñ kyā tabsira karūñ

is qaid meñ abhī mujhe Daalā nahīñ gayā

aankhon se us ki yaad ka haala nahin gaya

kanTa ye apne dil se nikala nahin gaya

gham khae aansuon ko piya honT si liye

koi bhi hukm aap ka Tala nahin gaya

har chiz kaenat ki raushan hui magar

zehn-e-bashar se hirs ka jala nahin gaya

diwan-gan-e-husn ki ek bhiD thi wahan

main us ki anjuman mein nirala nahin gaya

wo ek bar aae the dahliz pe meri

phir is ke ba'd ghar se ujala nahin gaya

har shaKHs ke labon pe hain us ki hikayaten

zalim se apna husn sanbhaala nahin gaya

aasaishon pe 'rahi' main kya tabsira karun

is qaid mein abhi mujhe Dala nahin gaya