aansu beche zaKHm KHaride aahon ko aadhaar kiya

aañsū beche zaḳhm ḳharīde aahoñ ko ādhār kiyā

pyaar ke naam pe ham ne jag meñ ghāTe kā byopār kiyā

jis se naata toḌ chuke haiñ vo bhī jism hamārā hai

vo bhī apnā hī chehra hai jis se ham ne pyaar kiyā

kaise kaise jhuuT tarāshe rishtoñ kī sachchā.ī ne

kitnī dhuñdlī rekhāoñ ko āñkhoñ ne ākār kiyā

dhīre dhīre har sargoshī sannāToñ meñ Duub ga.ī

ab to ye bhī yaad nahīñ hai kis ne kyā iqrār kiyā

kyoñ andhī abhīlāshā bāñdhī sāñsoñ se nādānī ne

āḳhir kyoñ dīvār-o-dar par rangoñ ne upkār kiyā

sadiyoñ kī pyāsī dhartī par angāre se ug aa.e

jis din merī sachchā.ī se duniyā ne inkār kiyā

tābish-e-mehr-o-māh se jis din zulmat-e-fikr huī raushan

ham ne apne zauq-e-nazar ko varaq varaq tah-dār kiyā

kambal oḌhe varna rāteñ gahre sapnoñ meñ gum thiiñ

bhalā huā sūraj ne aakar dhartī ko bedār kiyā

is ehsān kā badla shāyad chukā na pā.ūñ maiñ 'parvāz'

dhajjī dhajjī kar ke dil ko jo mujh se bezār kiyā

aansu beche zaKHm KHaride aahon ko aadhaar kiya

pyar ke nam pe hum ne jag mein ghaTe ka byopar kiya

jis se nata toD chuke hain wo bhi jism hamara hai

wo bhi apna hi chehra hai jis se hum ne pyar kiya

kaise kaise jhuT tarashe rishton ki sachchai ne

kitni dhundli rekhaon ko aankhon ne aakar kiya

dhire dhire har sargoshi sannaTon mein Dub gai

ab to ye bhi yaad nahin hai kis ne kya iqrar kiya

kyon andhi abhilasha bandhi sanson se nadani ne

aaKHir kyon diwar-o-dar par rangon ne upkar kiya

sadiyon ki pyasi dharti par angare se ug aae

jis din meri sachchai se duniya ne inkar kiya

tabish-e-mehr-o-mah se jis din zulmat-e-fikr hui raushan

hum ne apne zauq-e-nazar ko waraq waraq tah-dar kiya

kambal oDhe warna raaten gahre sapnon mein gum thin

bhala hua suraj ne aakar dharti ko bedar kiya

is ehsan ka badla shayad chuka na paun main 'parwaz'

dhajji dhajji kar ke dil ko jo mujh se bezar kiya