aansuon ko na sazawar-e-malamat samjho

āñsuoñ ko na sazāvār-e-malāmat samjho

in charāġhoñ ko shab-e-ġham kī zarūrat samjho

kaun jaane kise phir ghar kī ho dahlīz nasīb

āj-kal ghar se nikalne ko bhī hijrat samjho

jazba-e-ishq nahīñ harf-o-bayāñ kā muhtāj

merī ḳhāmoshī ko iz.hār-e-mohabbat samjho

dāstāñ fasl-e-bahārāñ kī sunāne vaalo

jeb-o-dāman pe likhī hai jo 'ibārat samjho

be-hisī sang-dilī zulm baġhāvat nafrat

aise hālāt ko āsār-e-qayāmat samjho

ahl-e-zar sun nahīñ sakte kabhī āvāz-e-fuġhāñ

in ḳhudā-vandoñ ko mahrūm-e-samā.at samjho

rāz-e-hastī se bhī uTh jā.eñge saare parde

pahle ik zarra-e-ḳhākī kī haqīqat samjho

zindagī kī hī 'alāmat hai dhḌaknā dil kā

dard ko fitrat-e-insāñ kī amānat samjho

ajnabī shahr kī begāna fazāoñ meñ 'sirāj'

koī pahchān le tum ko to ġhanīmat samjho

aansuon ko na sazawar-e-malamat samjho

in charaghon ko shab-e-gham ki zarurat samjho

kaun jaane kise phir ghar ki ho dahliz nasib

aaj-kal ghar se nikalne ko bhi hijrat samjho

jazba-e-ishq nahin harf-o-bayan ka muhtaj

meri KHamoshi ko izhaar-e-mohabbat samjho

dastan fasl-e-bahaaran ki sunane walo

jeb-o-daman pe likhi hai jo 'ibarat samjho

be-hisi sang-dili zulm baghawat nafrat

aise haalat ko aasar-e-qayamat samjho

ahl-e-zar sun nahin sakte kabhi aawaz-e-fughan

in KHuda-wandon ko mahrum-e-samaat samjho

raaz-e-hasti se bhi uTh jaenge sare parde

pahle ek zarra-e-KHaki ki haqiqat samjho

zindagi ki hi 'alamat hai dhDakna dil ka

dard ko fitrat-e-insan ki amanat samjho

ajnabi shahr ki begana fazaon mein 'siraj'

koi pahchan le tum ko to ghanimat samjho