aansuon se likhi tahrir bhi ho sakti hai

āñsuoñ se likhī tahrīr bhī ho saktī hai

ġham kī ruḳhsār pe tafsīr bhī ho saktī hai

terī duniyā meñ mirā kaam abhī baaqī hai

lauTne meñ zarā tāḳhīr bhī ho saktī hai

dam-e-ruḳhsat tire hoñToñ kī ye phīkī muskān

mere in paañv kī zanjīr bhī ho saktī hai

dil se khelo na mire is ke kisī goshe meñ

aap kī hī koī tasvīr bhī ho saktī hai

shak nahīñ is meñ koī vaqt agar saath rahā

phir vahīñ ik na.ī tā'mīr bhī ho saktī hai

ḳhvāb hī ḳhvāb kī duniyā hai mirī āñkhoñ meñ

in kī koī hasīñ tā'bīr bhī ho saktī hai

zindagī dasht kī sūrat hī sahī sabr to kar

ek din vādī-e-kashmīr bhī ho saktī hai

vaqt aane to do zulmat ko miTāne ke liye

sandalī hāthoñ meñ shamshīr bhī ho saktī hai

ājizī par kisī zālim kī kabhī rahm na kar

makr ho saktā hai tadbīr bhī ho saktī hai

aarzū merī du'ā aap kī rang lā.egī

varna ye āḳhirī tahrīr bhī ho saktī hai

kuchh rahe yā na rahe pās-e-anā hai 'anvar'

bas anā hī mirī jāgīr bhī ho saktī hai

aansuon se likhi tahrir bhi ho sakti hai

gham ki ruKHsar pe tafsir bhi ho sakti hai

teri duniya mein mera kaam abhi baqi hai

lauTne mein zara taKHir bhi ho sakti hai

dam-e-ruKHsat tere honTon ki ye phiki muskan

mere in panw ki zanjir bhi ho sakti hai

dil se khelo na mere is ke kisi goshe mein

aap ki hi koi taswir bhi ho sakti hai

shak nahin is mein koi waqt agar sath raha

phir wahin ek nai ta'mir bhi ho sakti hai

KHwab hi KHwab ki duniya hai meri aankhon mein

in ki koi hasin ta'bir bhi ho sakti hai

zindagi dasht ki surat hi sahi sabr to kar

ek din wadi-e-kashmir bhi ho sakti hai

waqt aane to do zulmat ko miTane ke liye

sandali hathon mein shamshir bhi ho sakti hai

aajizi par kisi zalim ki kabhi rahm na kar

makr ho sakta hai tadbir bhi ho sakti hai

aarzu meri du'a aap ki rang laegi

warna ye aaKHiri tahrir bhi ho sakti hai

kuchh rahe ya na rahe pas-e-ana hai 'anwar'

bas ana hi meri jagir bhi ho sakti hai