aap apne raqib hain hum log

aap apne raqīb haiñ ham log

kis qadar bad-nasīb haiñ ham log

daulat-e-dard se haiñ mālā-māl

go ba-zāhir ġharīb haiñ ham log

ham ko har haal meñ ujaḌnā hai

āshiqoñ kā nasīb haiñ ham log

jitne apnī ḳhudī se duur hue

utne un se qarīb haiñ ham log

phir na sañvre bigaḌ ke ham shāyad

dushmanoñ kā nasīb kā nasīb haiñ ham log

maut se khelte haiñ shām-o-sahar

zindagī ke qarīb haiñ ham log

un kī nazroñ se duur haiñ phir bhī

un ke dil se qarīb haiñ ham log

ham se pūchho haqīqateñ ġham kī

der se ġham-nasīb haiñ ham log

kis ko jā kar sunā.īñ haal apnā

ajnabī haiñ ġharīb haiñ ham log

dosh-e-hastī pe haar haiñ 'ra.anā'

āj-kal ke adiib haiñ ham log

aap apne raqib hain hum log

kis qadar bad-nasib hain hum log

daulat-e-dard se hain mala-mal

go ba-zahir gharib hain hum log

hum ko har haal mein ujaDna hai

aashiqon ka nasib hain hum log

jitne apni KHudi se dur hue

utne un se qarib hain hum log

phir na sanwre bigaD ke hum shayad

dushmanon ka nasib ka nasib hain hum log

maut se khelte hain sham-o-sahar

zindagi ke qarib hain hum log

un ki nazron se dur hain phir bhi

un ke dil se qarib hain hum log

hum se puchho haqiqaten gham ki

der se gham-nasib hain hum log

kis ko ja kar sunain haal apna

ajnabi hain gharib hain hum log

dosh-e-hasti pe haar hain 'rana'

aaj-kal ke adib hain hum log