aap apni zat mein simTa hua aalam tamam

aap apnī zaat meñ simTā huā aalam tamām

tum ko yuuñ jaanā ki thā jaanā huā aalam tamām

kal to begāna thā lekin aaj hai begāna-tar

ik sar-e-añgusht par rakkhā huā aalam tamām

dastaras kā zikr kyā hai āgahī kī baat kyā

rū-ba-rū hai gard meñ uḌtā huā aalam tamām

gar badal jaate to thī duniyā kī har shai hasb-e-hāl

ham nahīñ badle to hai badlā huā aalam tamām

jāntā huuñ maiñ agar jaagā to ye so jā.egā

ab huuñ ḳhvābīda to hai jaagā huā aalam tamām

uñgliyoñ ke pech se pechīda girheñ tah-ba-tah

nāḳhunoñ ke darmiyāñ uljhā huā aalam tamām

ik mirī ḳhātir jo the sab ke duā-go kyā hue

uf ye mahrūmī ki hai sahmā huā aalam tamām

aap apni zat mein simTa hua aalam tamam

tum ko yun jaana ki tha jaana hua aalam tamam

kal to begana tha lekin aaj hai begana-tar

ek sar-e-angusht par rakkha hua aalam tamam

dastaras ka zikr kya hai aagahi ki baat kya

ru-ba-ru hai gard mein uDta hua aalam tamam

gar badal jate to thi duniya ki har shai hasb-e-haal

hum nahin badle to hai badla hua aalam tamam

jaanta hun main agar jaga to ye so jaega

ab hun KHwabida to hai jaga hua aalam tamam

ungliyon ke pech se pechida girhen tah-ba-tah

naKHunon ke darmiyan uljha hua aalam tamam

ek meri KHatir jo the sab ke dua-go kya hue

uf ye mahrumi ki hai sahma hua aalam tamam