aap hain kya malak-sifat aap hain kya pata nahin

aap haiñ kyā malak-sifat aap haiñ kyā patā nahīñ

ham to gunāhgār haiñ ham koī pārsā nahīñ

zindagī aadmī kī jab halqa-e-ḳhair-o-shar meñ hai

kaise kaheñ ye aap se ham se huī ḳhatā nahīñ

vo to har ek shai meñ hai ġhaur se dekhiye agar

kis kī majāl hai yahāñ jo ye kahe ḳhudā nahīñ

kī haiñ basīrateñ atā ilm diyā hunar diyā

kyā ye hamāre haal pe rahmat-e-kibriyā nahīñ

us ne kiyā ḳhushā mujhe daulat-e-faqr se ġhanī

ab koī aarzū nahīñ ab koī mudda.ā nahīñ

ḳhāliq-e-be-niyāz kā ham se na haq adā huā

haq hai ki ham se be-ḳhabar vo to kabhī huā nahīñ

jo bhī hamāre paas thā us pe nisār kar diyā

nazr kareñ to kyā kareñ kuchh bhī to ab bachā nahīñ

ne.amateñ be-hisāb diiñ us ne har ek shaḳhs ko

rahmat-e-kirdgār kī had nahīñ intihā nahīñ

apne hoñ yā parā.e hoñ sab hī hamāre saath haiñ

aaj ḳhudā kā shukr hai ham se koī ḳhafā nahīñ

dekheñ agar qarīb se kam nahīñ vo habīb se

shakl se vo burā sahī 'yās' magar burā nahīñ

aap hain kya malak-sifat aap hain kya pata nahin

hum to gunahgar hain hum koi parsa nahin

zindagi aadmi ki jab halqa-e-KHair-o-shar mein hai

kaise kahen ye aap se hum se hui KHata nahin

wo to har ek shai mein hai ghaur se dekhiye agar

kis ki majal hai yahan jo ye kahe KHuda nahin

ki hain basiraten ata ilm diya hunar diya

kya ye hamare haal pe rahmat-e-kibriya nahin

us ne kiya KHusha mujhe daulat-e-faqr se ghani

ab koi aarzu nahin ab koi muddaa nahin

KHaliq-e-be-niyaz ka hum se na haq ada hua

haq hai ki hum se be-KHabar wo to kabhi hua nahin

jo bhi hamare pas tha us pe nisar kar diya

nazr karen to kya karen kuchh bhi to ab bacha nahin

neamaten be-hisab din us ne har ek shaKHs ko

rahmat-e-kirdgar ki had nahin intiha nahin

apne hon ya parae hon sab hi hamare sath hain

aaj KHuda ka shukr hai hum se koi KHafa nahin

dekhen agar qarib se kam nahin wo habib se

shakl se wo bura sahi 'yas' magar bura nahin