aap jate hain to viran paDe rahte hain

aap jaate haiñ to vīrān paḌe rahte haiñ

der tak ham yūñhī be-jān paḌe rahte haiñ

ik taraf zulm kā bāzār sajā rahtā hai

ik taraf munsif-o-mīzān paḌe rahte haiñ

ajnabiyyat hai ki baḌhtī hī chalī jaatī hai

apne ghar aa ke bhī mehmān paḌe rahte haiñ

raat har pal hameñ maslūb kiye rakhtī hai

sab samajhte haiñ ki āsān paḌe rahte haiñ

har ghaḌī ek adālat sī lagī rahtī hai

har ghaḌī ham pas-e-zindān paḌe rahte haiñ

log phūñkoñ se Darā kar use ḳhush hote haiñ

jis ke qadmoñ tale tūfān paḌe rahte haiñ

aap jate hain to viran paDe rahte hain

der tak hum yunhi be-jaan paDe rahte hain

ek taraf zulm ka bazar saja rahta hai

ek taraf munsif-o-mizan paDe rahte hain

ajnabiyyat hai ki baDhti hi chali jati hai

apne ghar aa ke bhi mehman paDe rahte hain

raat har pal hamein maslub kiye rakhti hai

sab samajhte hain ki aasan paDe rahte hain

har ghaDi ek adalat si lagi rahti hai

har ghaDi hum pas-e-zindan paDe rahte hain

log phunkon se Dara kar use KHush hote hain

jis ke qadmon tale tufan paDe rahte hain