aap jab se qarib aa baiThe

aap jab se qarīb aa baiThe

ranj-o-ġham duur ham se jā baiThe

fāsle kā kiyā ta.ayyun ḳhud

fāsla jaane kyoñ bhulā baiThe

baḌh gayā jab junūn vahshat meñ

saakh ulfat kī ham gañvā baiThe

raushnī kī talāsh meñ ḳhud hī

sham-e-hastī ko ham bujhā baiThe

chāñd ko chhūne kī tamanna meñ

apnī parvāz ham bhulā baiThe

kho.e kho.e se jab rahe tanhā

mahfil-e-ranj-o-ġham sajā baiThe

jab ta.alluq nahīñ rahā 'monis'

naqsh-e-māzī ko ham miTā baiThe

aap jab se qarib aa baiThe

ranj-o-gham dur hum se ja baiThe

fasle ka kiya tayyun KHud

fasla jaane kyon bhula baiThe

baDh gaya jab junun wahshat mein

sakh ulfat ki hum ganwa baiThe

raushni ki talash mein KHud hi

sham-e-hasti ko hum bujha baiThe

chand ko chhune ki tamanna mein

apni parwaz hum bhula baiThe

khoe khoe se jab rahe tanha

mahfil-e-ranj-o-gham saja baiThe

jab talluq nahin raha 'monis'

naqsh-e-mazi ko hum miTa baiThe