aap jaison se wafa kar ke mila kuchh bhi nahin

aap jaisoñ se vafā kar ke milā kuchh bhī nahīñ

ḳhair aisī baat se mujh ko gila kuchh bhī nahīñ

tere jaate hī mire ghar ko udāsī khā ga.ī

ab yahāñ dīvār-o-dar ke sivā kuchh bhī nahīñ

ham ḳhayāloñ meñ tere rahte haiñ jaise qaid meñ

kaun kahtā hai mohabbat kī sazā kuchh bhī nahīñ

maiñ to hijrat ke ḳhayāloñ se bhī Dar jaatā thā aur

ek vo jis ko bichhaḌne par huā kuchh bhī nahīñ

aap māneñ yā na māneñ aap kī marzī magar

aisā kahnā to ġhalat hai ki ḳhudā kuchh bhī nahīñ

mujh meñ se tujh ko ghaTāyā to pata hai kyā huā

mujh meñ se tujh ko ghaTāyā to bachā kuchh bhī nahīñ

us ke hone se añdherā chhaT sā jaatā thā 'vihān'

varna aisī chāñd rātoñ meñ rakhā kuchh bhī nahīñ

aap jaison se wafa kar ke mila kuchh bhi nahin

KHair aisi baat se mujh ko gila kuchh bhi nahin

tere jate hi mere ghar ko udasi kha gai

ab yahan diwar-o-dar ke siwa kuchh bhi nahin

hum KHayalon mein tere rahte hain jaise qaid mein

kaun kahta hai mohabbat ki saza kuchh bhi nahin

main to hijrat ke KHayalon se bhi Dar jata tha aur

ek wo jis ko bichhaDne par hua kuchh bhi nahin

aap manen ya na manen aap ki marzi magar

aisa kahna to ghalat hai ki KHuda kuchh bhi nahin

mujh mein se tujh ko ghaTaya to pata hai kya hua

mujh mein se tujh ko ghaTaya to bacha kuchh bhi nahin

us ke hone se andhera chhaT sa jata tha 'wihan'

warna aisi chand raaton mein rakha kuchh bhi nahin