aap ka jis raste mein naqsh-e-pa mil jaega

aap kā jis rāste meñ naqsh-e-pā mil jā.egā

tālib-e-manzil ko manzil kā pata mil jā.egā

jānte ho tum se mil kar kis ko kyā mil jā.egā

zindagī mil jā.egī aur mudda.ā mil jā.egā

aap kī dariyā-dilī par naaz farmā.eñge ham

jab hameñ apnī mohabbat kā sila mil jā.egā

mushkileñ hastī kī apnī kam se kam ho jā.eñgī

dostoñ jis din hameñ apnā pata mil jā.egā

shāḳh-e-gul kuchh is tarah katrī ga.ī haiñ dosto

agle mausam meñ koī pattā harā mil jā.egā

us ko paane ke liye ḳhud ko lagāo dosto

DhūñDne se aap ko be-shak ḳhudā mil jā.egā

aap ko vo bhuul jā.eñge zamāne kī tarah

jab unheñ 'mahmūd' koī dūsrā mil jā.egā

aap ka jis raste mein naqsh-e-pa mil jaega

talib-e-manzil ko manzil ka pata mil jaega

jaante ho tum se mil kar kis ko kya mil jaega

zindagi mil jaegi aur muddaa mil jaega

aap ki dariya-dili par naz farmaenge hum

jab hamein apni mohabbat ka sila mil jaega

mushkilen hasti ki apni kam se kam ho jaengi

doston jis din hamein apna pata mil jaega

shaKH-e-gul kuchh is tarah katri gai hain dosto

agle mausam mein koi patta hara mil jaega

us ko pane ke liye KHud ko lagao dosto

DhunDne se aap ko be-shak KHuda mil jaega

aap ko wo bhul jaenge zamane ki tarah

jab unhen 'mahmud' koi dusra mil jaega