aap ke izn-e-mulaqat se ji Darta hai

aap ke izn-e-mulāqāt se jī Dartā hai

apne badle hue hālāt se jī Dartā hai

aap tajdīd-e-mohabbat kā na diije paiġhām

aap kī chashm-e-ināyāt se jī Dartā hai

kal ye 'ālam thā ki har baat pe hañs dete the

ab ye 'ālam hai ki har baat se jī Dartā hai

ham-nashīno zarā kuchh der mire saath raho

aaj tanhā.ī ke lamhāt se jī Dartā hai

dil meñ jab sozish-e-ġham aag lagā detī hai

chashm-e-afsurda kī barsāt se jī Dartā hai

chāhtā huuñ ki ye dil shahr-e-nigārāñ ho magar

itnī rañgīnī-e-jazbāt se jī Dartā hai

zaḳhm kuchh aur sulag jaate haiñ dil ke 'shāhid'

ab to is tāroñ bharī raat se jī Dartā hai

aap ke izn-e-mulaqat se ji Darta hai

apne badle hue haalat se ji Darta hai

aap tajdid-e-mohabbat ka na dije paigham

aap ki chashm-e-inayat se ji Darta hai

kal ye 'alam tha ki har baat pe hans dete the

ab ye 'alam hai ki har baat se ji Darta hai

ham-nashino zara kuchh der mere sath raho

aaj tanhai ke lamhat se ji Darta hai

dil mein jab sozish-e-gham aag laga deti hai

chashm-e-afsurda ki barsat se ji Darta hai

chahta hun ki ye dil shahr-e-nigaran ho magar

itni rangini-e-jazbaat se ji Darta hai

zaKHm kuchh aur sulag jate hain dil ke 'shahid'

ab to is taron bhari raat se ji Darta hai