aap ke shahr mein bhaTkenge ya mar jaenge

aap ke shahr meñ bhaTkeñge yā mar jā.eñge

ham ko lagtā nahīñ ham lauT ke ghar jā.eñge

be-īmānī se pare duniyā banānī hai hameñ

ham na jā.eñge jidhar ahl-e-nazar jā.eñge

aap kā kyā hai kahīñ aur lagā leñgī dil

jān-e-man ye mire ash.ār kidhar jā.eñge

kyā kareñ itnī hasīñ hai tirī duniyā maulā

varna sochā to yahī thā ki sudhar jā.eñge

ham ne sochā thā yahī ham nahīñ socheñge kabhī

ab to lagtā hai isī soch meñ mar jā.eñge

itne ehsān to farhād ke 'ashraf' par haiñ

sab ko Dar hai ye jo kahte haiñ vo kar jā.eñge

aap ke shahr mein bhaTkenge ya mar jaenge

hum ko lagta nahin hum lauT ke ghar jaenge

be-imani se pare duniya banani hai hamein

hum na jaenge jidhar ahl-e-nazar jaenge

aap ka kya hai kahin aur laga lengi dil

jaan-e-man ye mere ashaar kidhar jaenge

kya karen itni hasin hai teri duniya maula

warna socha to yahi tha ki sudhar jaenge

hum ne socha tha yahi hum nahin sochenge kabhi

ab to lagta hai isi soch mein mar jaenge

itne ehsan to farhad ke 'ashraf' par hain

sab ko Dar hai ye jo kahte hain wo kar jaenge