aap ki nazron mein shayad is liye achchha hun main

aap kī nazroñ meñ shāyad is liye achchhā huuñ maiñ

dekhtā suntā huuñ sab kuchh phir bhī chup rahtā huuñ maiñ

is liye mujh se ḳhafā rahtī hai aksar ye zamīñ

āsmāñ ko sar pe le kar ghūmtā phirtā huuñ maiñ

ḳhaak meñ milnā hī ashkoñ kā muqaddar hai magar

kyā ye kam hai us kī palkoñ par abhī Thahrā huuñ maiñ

ḳhaar hī ko ho mubārak ḳhaar kī umr-e-darāz

gul-sifat huuñ bas javāñ hote hī mar jaatā huuñ maiñ

bādaloñ ko shāyad is kā koī andāza nahīñ

ain dariyā meñ huuñ lekin kis qadar pyāsā huuñ maiñ

ġham-zada dil ko sitam se duur rakhne ke liye

bārhā ḳhud apne hī dil par sitam Dhātā huuñ maiñ

kyuuñ vo mere sāmne aane se Dartā hai 'valī'

ḳhāmushī fitrat hai merī ek ā.īna huuñ maiñ

aap ki nazron mein shayad is liye achchha hun main

dekhta sunta hun sab kuchh phir bhi chup rahta hun main

is liye mujh se KHafa rahti hai aksar ye zamin

aasman ko sar pe le kar ghumta phirta hun main

KHak mein milna hi ashkon ka muqaddar hai magar

kya ye kam hai us ki palkon par abhi Thahra hun main

KHar hi ko ho mubarak KHar ki umr-e-daraaz

gul-sifat hun bas jawan hote hi mar jata hun main

baadalon ko shayad is ka koi andaza nahin

ain dariya mein hun lekin kis qadar pyasa hun main

gham-zada dil ko sitam se dur rakhne ke liye

barha KHud apne hi dil par sitam Dhata hun main

kyun wo mere samne aane se Darta hai 'wali'

KHamushi fitrat hai meri ek aaina hun main