aap ki shoKHi-e-inkar nai baat nahin

aap kī shoḳhī-e-inkār na.ī baat nahīñ

ye to mā'mūl hai sarkār na.ī baat nahīñ

aap ko ḳhūn-e-tamannā pe ta'ajjub kyuuñ hai

roz mar jaate haiñ bīmār na.ī baat nahīñ

choT paḌtī nahīñ ehsās pe ab muddat se

aap kī talḳhī-e-guftār na.ī baat nahīñ

husn-e-iḳhlās ke badle meñ junūñ miltā hai

'aam hai shāmat-e-kirdār na.ī baat nahīñ

pursish-e-hāl ke baa'd un ko taraddud kaisā

kah chuke ham to ka.ī baar na.ī baat nahīñ

aap ki shoKHi-e-inkar nai baat nahin

ye to ma'mul hai sarkar nai baat nahin

aap ko KHun-e-tamanna pe ta'ajjub kyun hai

roz mar jate hain bimar nai baat nahin

choT paDti nahin ehsas pe ab muddat se

aap ki talKHi-e-guftar nai baat nahin

husn-e-iKHlas ke badle mein junun milta hai

'am hai shamat-e-kirdar nai baat nahin

pursish-e-haal ke ba'd un ko taraddud kaisa

kah chuke hum to kai bar nai baat nahin