aapko gardish-e-ayyam se Dar lagta hai

aap ko gardish-e-ayyām se Dar lagtā hai

aur hameñ ishq ke anjām se Dar lagtā hai

chashm-e-sāqī ke ishāre meñ nihāñ kyā shai thī

hasrat-e-bāda-e-gulfām se Dar lagtā hai

zer-e-lab un ke tabassum se sukūn maañg to luuñ

apnī hī jur.at-e-nākām se Dar lagtā hai

naam jo āTh-pahr vird-e-zabāñ rahtā thā

ab ye vahshat hai usī naam se Dar lagtā hai

hazrat-e-ḳhizar se thī rāhbarī kī ḳhvāhish

ab usī ḳhvāhish-e-nākām se Dar lagtā hai

manzileñ ishq kī be-ḳhauf-o-ḳhatar tai kiiñ haiñ

ab ye aalam hai ki har gaam se Dar lagtā hai

kyuuñ vazīfa sahar-o-shām kiyā tark 'safīr'

kyuuñ ḳhyāl-e-sahr-o-shām se Dar lagtā hai

aap ko gardish-e-ayyam se Dar lagta hai

aur hamein ishq ke anjam se Dar lagta hai

chashm-e-saqi ke ishaare mein nihan kya shai thi

hasrat-e-baada-e-gulfam se Dar lagta hai

zer-e-lab un ke tabassum se sukun mang to lun

apni hi jurat-e-nakaam se Dar lagta hai

nam jo aaTh-pahr wird-e-zaban rahta tha

ab ye wahshat hai usi nam se Dar lagta hai

hazrat-e-KHizar se thi rahbari ki KHwahish

ab usi KHwahish-e-nakaam se Dar lagta hai

manzilen ishq ki be-KHauf-o-KHatar tai kin hain

ab ye aalam hai ki har gam se Dar lagta hai

kyun wazifa sahar-o-sham kiya tark 'safir'

kyun KHyal-e-sahr-o-sham se Dar lagta hai