aap par jab se tabiat aai

aap par jab se tabī'at aa.ī

roz-o-shab mujh pe qayāmat aa.ī

haa.e barbād kiyā hai kyā kyā

raas ham ko na mohabbat aa.ī

ai havas-kār tirī nazroñ meñ

kab bhalā merī haqīqat aa.ī

zindagī biit ga.ī hai yūñhī

jab bhī aa.ī shab-e-furqat aa.ī

zulm go us ne bahut baar kiye

lab pe mere na shikāyat aa.ī

terī ḳhātir se jahāñ ko chhoḌā

phir bhī tujh ko na mohabbat aa.ī

dil-e-betāb hai taḌpā kyā kyā

jab kabhī yaad vo sūrat aa.ī

in fasānoñ meñ jahāñ ke aksar

kuchh nazar mujh ko haqīqat aa.ī

aap ma.asūm bahut the pahle

aap ko kab se sharārat aa.ī

ai 'zakī' ishq ke hāthoñ ham par

jab bhī aa.ī to musībat aa.ī

aap par jab se tabi'at aai

roz-o-shab mujh pe qayamat aai

hae barbaad kiya hai kya kya

ras hum ko na mohabbat aai

ai hawas-kar teri nazron mein

kab bhala meri haqiqat aai

zindagi bit gai hai yunhi

jab bhi aai shab-e-furqat aai

zulm go us ne bahut bar kiye

lab pe mere na shikayat aai

teri KHatir se jahan ko chhoDa

phir bhi tujh ko na mohabbat aai

dil-e-betab hai taDpa kya kya

jab kabhi yaad wo surat aai

in fasanon mein jahan ke aksar

kuchh nazar mujh ko haqiqat aai

aap masum bahut the pahle

aap ko kab se shararat aai

ai 'zaki' ishq ke hathon hum par

jab bhi aai to musibat aai