aap samjhen to hamare ishq ki rudad bhi

aap samjheñ to hamāre ishq kī rūdād bhī

dāstān-e-sīs bhī hai qissa-e-farhād bhī

dil meñ lākhoñ ārzūeñ haiñ hazāroñ hasrateñ

ye vo bastī hai jo hai barbād bhī ābād bhī

shukriya ai gardish-e-ayyām tere faiz se

gulsitāñ bhī ham ne dekhā ḳhāna-e-sayyād bhī

un kā banda ho ke bhī hai pās-e-ḳhuddārī mujhe

maiñ asīr-e-ishq bhī huuñ aur huuñ āzād bhī

ab badal jaa.e mizāj-e-husn bhī to kyā ajab

rāhat-e-jāñ hotī jaatī hai kisī kī yaad bhī

raas aa.ī hai kahāñ mujh ko fazā-e-gulsitāñ

bad-gumāñ hai bāġhbāñ bhī aur hai sayyād bhī

har tarah dilchasp-o-dilkash thā fasāna ishq kā

daad ke qābil hai lekin husn kī rūdād bhī

aap samjhen to hamare ishq ki rudad bhi

dastan-e-sis bhi hai qissa-e-farhad bhi

dil mein lakhon aarzuen hain hazaron hasraten

ye wo basti hai jo hai barbaad bhi aabaad bhi

shukriya ai gardish-e-ayyam tere faiz se

gulsitan bhi hum ne dekha KHana-e-sayyaad bhi

un ka banda ho ke bhi hai pas-e-KHuddari mujhe

main asir-e-ishq bhi hun aur hun aazad bhi

ab badal jae mizaj-e-husn bhi to kya ajab

rahat-e-jaan hoti jati hai kisi ki yaad bhi

ras aai hai kahan mujh ko faza-e-gulsitan

bad-guman hai baghban bhi aur hai sayyaad bhi

har tarah dilchasp-o-dilkash tha fasana ishq ka

dad ke qabil hai lekin husn ki rudad bhi