aap tanha na kahin jaen Tahalne ke liye

aap tanhā na kahīñ jaa.eñ Tahalne ke liye

saath uThtī hai qayāmat bhī to chalne ke liye

ban chukī qabr mirī jab to vo hañs kar bole

ik jagah aur huī naaz se chalne ke liye

dekhiye tā-ba-jigar aa.e ki dil tak aa.e

uTh rahī hai nigah-e-nāz Tahalne ke liye

sham.a ke gul mire madfan pe chaḌhāne laa.e

husn-e-dil-soz ye pahlū mire jalne ke liye

tezī-e-nok-e-mizha siine meñ rauzan kar de

hasrateñ dil meñ taḌaptī haiñ nikalne ke liye

gul huī sham.a dam-e-sub.h ye kah kar 'safdar'

kal phir aanā hai isī bazm meñ jalne ke liye

aap tanha na kahin jaen Tahalne ke liye

sath uThti hai qayamat bhi to chalne ke liye

ban chuki qabr meri jab to wo hans kar bole

ek jagah aur hui naz se chalne ke liye

dekhiye ta-ba-jigar aae ki dil tak aae

uTh rahi hai nigah-e-naz Tahalne ke liye

shama ke gul mere madfan pe chaDhane lae

husn-e-dil-soz ye pahlu mere jalne ke liye

tezi-e-nok-e-mizha sine mein rauzan kar de

hasraten dil mein taDapti hain nikalne ke liye

gul hui shama dam-e-subh ye kah kar 'safdar'

kal phir aana hai isi bazm mein jalne ke liye