aap tarkash mein agar tir liye baiThe hain

aap tarkash meñ agar tiir liye baiThe haiñ

ham bhī fariyād meñ tāsīr liye baiThe haiñ

ham baġhal meñ dil-e-dil-gīr liye baiThe haiñ

ġham kī muñh boltī tasvīr liye baiThe haiñ

aisī vahshat ke nisār aise junūñ ke sadqe

vo mire vāste zanjīr liye baiThe haiñ

shāyad ai shauq-e-shahādat tirī qismat khul jaa.e

sun rahā huuñ ki vo shamshīr liye baiThe haiñ

koī suntā bhī hai yuuñ ham jo kisī ke aage

qissa-e-shūmī-e-taqdīr liye baiThe haiñ

ai junūñ toḌ ke ab ham bhī bahut pachhtā.e

haath meñ paañv kī zanjīr liye baiThe haiñ

sau jagah hotī hai ham ko ḳhalish-e-ġham mahsūs

dil meñ ik tiir ke sau tiir liye baiThe haiñ

aap agar ham se ham-āġhosh nahīñ haiñ to na hoñ

dil meñ ham aap kī tasvīr liye baiThe haiñ

qatl ke ba.ad ab un ko bhī hai sadma 'nudrat'

lāsha-e-āshiq-e-dil-gīr liye baiThe haiñ

aap tarkash mein agar tir liye baiThe hain

hum bhi fariyaad mein tasir liye baiThe hain

hum baghal mein dil-e-dil-gir liye baiThe hain

gham ki munh bolti taswir liye baiThe hain

aisi wahshat ke nisar aise junun ke sadqe

wo mere waste zanjir liye baiThe hain

shayad ai shauq-e-shahadat teri qismat khul jae

sun raha hun ki wo shamshir liye baiThe hain

koi sunta bhi hai yun hum jo kisi ke aage

qissa-e-shumi-e-taqdir liye baiThe hain

ai junun toD ke ab hum bhi bahut pachhtae

hath mein panw ki zanjir liye baiThe hain

sau jagah hoti hai hum ko KHalish-e-gham mahsus

dil mein ek tir ke sau tir liye baiThe hain

aap agar hum se ham-aghosh nahin hain to na hon

dil mein hum aap ki taswir liye baiThe hain

qatl ke baad ab un ko bhi hai sadma 'nudrat'

lasha-e-ashiq-e-dil-gir liye baiThe hain