aapas mein koi rabt ka imkan bhi na tha

aapas meñ koī rabt kā imkān bhī na thā

donoñ taraf ye marhala āsān bhī na thā

chāragaroñ kī pursish-e-paiham ke bāvajūd

maiñ mutma.in na thā to pareshān bhī na thā

pahlū badal badal ke vo kartā thā guftugū

maiñ sab samajh rahā thā ki anjān bhī na thā

baat us kī dil meñ mere utartī chalī ga.ī

vo ajnabī thā aur mirā mehmān bhī na thā

kyuuñ mujh ko mezbānī kā mauqa na mil sakā

maiñ is qadar to be-sar-o-sāmān bhī na thā

vo kitnā sard-mehr thā mālūm ho gayā

va.ada-ḳhilāf ho ke pashemān bhī na thā

'kausar' amīr-e-shahr se milne meñ uzr kyuuñ

kuchh fā.eda nahīñ thā to nuqsān bhī na thā

aapas mein koi rabt ka imkan bhi na tha

donon taraf ye marhala aasan bhi na tha

chaaragaron ki pursish-e-paiham ke bawajud

main mutmain na tha to pareshan bhi na tha

pahlu badal badal ke wo karta tha guftugu

main sab samajh raha tha ki anjaan bhi na tha

baat us ki dil mein mere utarti chali gai

wo ajnabi tha aur mera mehman bhi na tha

kyun mujh ko mezbani ka mauqa na mil saka

main is qadar to be-sar-o-saman bhi na tha

wo kitna sard-mehr tha malum ho gaya

wada-KHilaf ho ke pasheman bhi na tha

'kausar' amir-e-shahr se milne mein uzr kyun

kuchh faeda nahin tha to nuqsan bhi na tha