aaqil hai ba-shuur hai kafi zahin bhi

aaqil hai bā-shu.ūr hai kaafī zahīn bhī

is par hai mustazād vo az-had hasīn bhī

bosa kisī bhī phuul kā ham ne nahīñ liyā

ruḳhsār muntazir rahe lab bhī jabīn bhī

ghar le liyā hai ain tire ghar ke sāmne

aur ik ḳharīd laayā huuñ maiñ dūrbīn bhī

sab kaam ho rahe haiñ ajiib is qadar ajiib

likhne se pahle sochte haiñ kātbīn bhī

ik shoḳh-o-shañg tifl chhupā hai darūn-e-dil

sanjīda lag rahā huuñ ba-zāhir matīn bhī

āñkhoñ meñ jis kī rahm ho hāthoñ meñ roTiyāñ

vo shaḳhs muflisoñ kā dharam bhī hai diin bhī

insāniyat ke jism pe chand aise daaġh haiñ

jin par hai sharmsār falak aur zamīn bhī

hañste hue maregā koī dil gazīda shaḳhs

aa.egā is Darāme ke andar vo siin bhī

ash.ār gar safar na kareñ dil se dil talak

dete nahīñ haiñ daad 'qamar' sāma.īn bhī

aaqil hai ba-shuur hai kafi zahin bhi

is par hai mustazad wo az-had hasin bhi

bosa kisi bhi phul ka hum ne nahin liya

ruKHsar muntazir rahe lab bhi jabin bhi

ghar le liya hai ain tere ghar ke samne

aur ek KHarid laya hun main durbin bhi

sab kaam ho rahe hain ajib is qadar ajib

likhne se pahle sochte hain katbin bhi

ek shoKH-o-shang tifl chhupa hai darun-e-dil

sanjida lag raha hun ba-zahir matin bhi

aankhon mein jis ki rahm ho hathon mein roTiyan

wo shaKHs muflison ka dharam bhi hai din bhi

insaniyat ke jism pe chand aise dagh hain

jin par hai sharmsar falak aur zamin bhi

hanste hue marega koi dil gazida shaKHs

aaega is Darame ke andar wo sin bhi

ashaar gar safar na karen dil se dil talak

dete nahin hain dad 'qamar' samain bhi