aarzu ek nadi ho jaise

aarzū ek nadī ho jaise

zindagī tishna-labī ho jaise

ye javānī tirī chāhat ke baġhair

mahz ik jām-e-tahī ho jaise

kal hī bichhḌe the magar lagtā hai

ik sadī biit ga.ī ho jaise

'umr-bhar qarz chukāyā is kā

ziist banñe kī bahī ho jaise

fasl chāñdī kī ugānā sar par

vaqt kī jādūgarī ho jaise

zulm sah kar bhī hai ḳhilqat ḳhāmosh

mohr hoñToñ pe lagī ho jaise

har taraf maut kā sannāTā hai

shahr par saaḌH satī ho jaise

yuuñ hai ik moḌ pe hairāñ sī hayāt

rāstā bhuul ga.ī ho jaise

paḌh ke tārīḳh ko yuuñ lagtā hai

ye mazālim kī sadā ho jaise

raakh kā Dher hai ab hasrat-e-dil

ik dulhan jal ke marī ho jaise

she'r kahtā huuñ salīqe se 'shabāb'

ye bhī ā.īna-garī ho jaise

aarzu ek nadi ho jaise

zindagi tishna-labi ho jaise

ye jawani teri chahat ke baghair

mahz ek jam-e-tahi ho jaise

kal hi bichhDe the magar lagta hai

ek sadi bit gai ho jaise

'umr-bhar qarz chukaya is ka

zist banne ki bahi ho jaise

fasl chandi ki ugana sar par

waqt ki jadugari ho jaise

zulm sah kar bhi hai KHilqat KHamosh

mohr honTon pe lagi ho jaise

har taraf maut ka sannaTa hai

shahr par saDH sati ho jaise

yun hai ek moD pe hairan si hayat

rasta bhul gai ho jaise

paDh ke tariKH ko yun lagta hai

ye mazalim ki sada ho jaise

rakh ka Dher hai ab hasrat-e-dil

ek dulhan jal ke mari ho jaise

she'r kahta hun saliqe se 'shabab'

ye bhi aaina-gari ho jaise