aarzu kab hai teri anjuman-arai ki

aarzū kab hai tirī anjuman-ārā.ī kī

dostī raas mujhe aa.ī hai tanhā.ī kī

kaun hai baḌh ke bujhā.e jo sulagte ghar ko

aañkh rakhtī hai ye duniyā to tamāshā.ī kī

sunñe vaalā nahīñ mazlūm ke dil kī chīḳheñ

guuñj hai aaj tire shahr meñ shahnā.ī kī

rang is gulshan-e-ālam kā yahāñ tak badlā

uḌ ga.ī bū-e-vafā bhaa.ī se ab bhaa.ī kī

rabt-e-ulfat na baḌhā had se ziyāda nādāñ

aage naubat kahīñ aa jaa.e na rusvā.ī kī

fan kā ḳhud aa.ina fankār huā kartā hai

kyā zarūrat hai ta.āruf kī shanāsā.ī kī

ḳhud ko daanā bhī samajhnā hai 'nazar' nādānī

ājizī asl meñ pahchān hai dānā.ī kī

aarzu kab hai teri anjuman-arai ki

dosti ras mujhe aai hai tanhai ki

kaun hai baDh ke bujhae jo sulagte ghar ko

aankh rakhti hai ye duniya to tamashai ki

sunne wala nahin mazlum ke dil ki chiKHen

gunj hai aaj tere shahr mein shahnai ki

rang is gulshan-e-alam ka yahan tak badla

uD gai bu-e-wafa bhai se ab bhai ki

rabt-e-ulfat na baDha had se ziyaada nadan

aage naubat kahin aa jae na ruswai ki

fan ka KHud aaina fankar hua karta hai

kya zarurat hai taaruf ki shanasai ki

KHud ko dana bhi samajhna hai 'nazar' nadani

aajizi asl mein pahchan hai danai ki