aarzu meri har ek puri ho ye mumkin kahan

aarzū merī har ik puurī ho ye mumkin kahāñ

aarzū karne pe pābandī nahīñ lekin yahāñ

āsmāñ ke ḳhvāb to har ik zamīñ dekhā kare

baat to tab hai zamīñ ke ḳhvāb dekhe āsmāñ

hai muqaddar kyā sivā.e is ke jo kuchh ho chukā

jo abhī honā hai us kī ḳhud likhoge dāstāñ

gar faroġh-e-zāt se niklo to kuchh hāsil bhī ho

varna āḳhir meñ tumhārī sab tag-o-dau rā.egāñ

maut kyā hai bhuul jaa.e jab har ik insāñ tumheñ

yaad rah jaao agar chāho hayāt-e-jāvidāñ

soch agar jāmid hai to goyā koī tālāb hai

fikr gar āzād hai to zindagī dariyā ravāñ

raaz vo bas raaz hai jo ek hī siine meñ hai

raaz kī ye baat hai tū ḳhud hī apnā rāz-dāñ

dostoñ ke dam se pur-raunaq 'hidāyat' zindagī

dil vagarna jāntā kyā thā ba-juz āh-o-fuġhāñ

aarzu meri har ek puri ho ye mumkin kahan

aarzu karne pe pabandi nahin lekin yahan

aasman ke KHwab to har ek zamin dekha kare

baat to tab hai zamin ke KHwab dekhe aasman

hai muqaddar kya siwae is ke jo kuchh ho chuka

jo abhi hona hai us ki KHud likhoge dastan

gar farogh-e-zat se niklo to kuchh hasil bhi ho

warna aaKHir mein tumhaari sab tag-o-dau raegan

maut kya hai bhul jae jab har ek insan tumhein

yaad rah jao agar chaho hayat-e-jawidan

soch agar jamid hai to goya koi talab hai

fikr gar aazad hai to zindagi dariya rawan

raaz wo bas raaz hai jo ek hi sine mein hai

raaz ki ye baat hai tu KHud hi apna raaz-dan

doston ke dam se pur-raunaq 'hidayat' zindagi

dil wagarna jaanta kya tha ba-juz aah-o-fughan