aarzuon ke dhaDakte shahr jal kar rah gae

ārzūoñ ke dhaḌakte shahr jal kar rah ga.e

kaise kaise hashr ḳhāmoshī meñ Dhal kar rah ga.e

ḳhātir-e-ḳhasta kā ab koī nahīñ pursān-e-hāl

kitne dildārī ke unvān the badal kar rah ga.e

ab kahāñ ahd-e-vafā kī pāsdārī ab kahāñ

jo haqā.eq the vo afsānoñ meñ Dhal kar rah ga.e

ab kahāñ vo sāhiloñ se sair-e-tūfān-e-hayāt

ab to vo sāhil talātum meñ badal kar rah ga.e

hāsil-e-ġham yā ġham-e-hāsil mayassar kuchh nahīñ

zindagānī ke sabhī asbāb jal kar rah ga.e

haa.e vo ġham jo bayāñ kī had meñ aa sakte na the

qaid-o-ashk-o-āh se aage nikal kar rah ga.e

al-amāñ hālāt kī mahshar-ḳhirāmī al-amāñ

Dagmagā.e is qadar goyā sambhal kar rah ga.e

rah gayā huuñ ek maiñ tanhā hujūm-e-barq meñ

ham-navā saare chaman ke saath jal kar rah ga.e

ban to sakte the vo tūfān-e-qayāmat-ḳhez bhī

jo dhaḌakte valvale ashkoñ meñ Dhal kar rah ga.e

ek vo haiñ Dālte haiñ māh-o-anjum par kamand

aur ik ham haiñ ki ḳhvāboñ se bahal kar rah ga.e

jin ko hāsil thā zamāne meñ sukūn-e-iztirāb

apne hī ehsās ke sho.aloñ meñ jal kar rah ga.e

jin kī ḳhāmoshī thī mash.hūr-e-zamāna ai 'salām'

aaj un ke muñh se bhī shikve nikal kar rah ga.e

aarzuon ke dhaDakte shahr jal kar rah gae

kaise kaise hashr KHamoshi mein Dhal kar rah gae

KHatir-e-KHasta ka ab koi nahin pursan-e-haal

kitne dildari ke unwan the badal kar rah gae

ab kahan ahd-e-wafa ki pasdari ab kahan

jo haqaeq the wo afsanon mein Dhal kar rah gae

ab kahan wo sahilon se sair-e-tufan-e-hayat

ab to wo sahil talatum mein badal kar rah gae

hasil-e-gham ya gham-e-hasil mayassar kuchh nahin

zindagani ke sabhi asbab jal kar rah gae

hae wo gham jo bayan ki had mein aa sakte na the

qaid-o-ashk-o-ah se aage nikal kar rah gae

al-aman haalat ki mahshar-KHirami al-aman

Dagmagae is qadar goya sambhal kar rah gae

rah gaya hun ek main tanha hujum-e-barq mein

ham-nawa sare chaman ke sath jal kar rah gae

ban to sakte the wo tufan-e-qayamat-KHez bhi

jo dhaDakte walwale ashkon mein Dhal kar rah gae

ek wo hain Dalte hain mah-o-anjum par kamand

aur ek hum hain ki KHwabon se bahal kar rah gae

jin ko hasil tha zamane mein sukun-e-iztirab

apne hi ehsas ke shoalon mein jal kar rah gae

jin ki KHamoshi thi mashhur-e-zamana ai 'salam'

aaj un ke munh se bhi shikwe nikal kar rah gae