aashiqi mein bhala-bura kya hai

āshiqī meñ bhalā-burā kyā hai

aa gayā dil to dekhnā kyā hai

vasl kī shab ye shoḳhiyāñ dekho

pūchhte haiñ ki mudda.ā kyā hai

log to kahte haiñ marīz-e-ishq

tum batāo mujhe huā kyā hai

bevafā.ī meñ aap kā shohra

aur hogā abhī huā kyā hai

chashm-e-pur-fan se un kī pūchheñge

ishva kyā chiiz hai adā kyā hai

un se vo vo adā nikaltī hai

jo nahīñ jānte adā kyā hai

mujh se pūchho shab-e-firāq kā haal

jāntā huuñ ki ye balā kyā hai

kyā qayāmat hai un se pūchhtā huuñ

nigah-e-chashm-e-fitna-zā kyā hai

abr uThā.e hai lo piyo ai 'lutf'

mai se tauba tumheñ huā kyā hai

aashiqi mein bhala-bura kya hai

aa gaya dil to dekhna kya hai

wasl ki shab ye shoKHiyan dekho

puchhte hain ki muddaa kya hai

log to kahte hain mariz-e-ishq

tum batao mujhe hua kya hai

bewafai mein aap ka shohra

aur hoga abhi hua kya hai

chashm-e-pur-fan se un ki puchhenge

ishwa kya chiz hai ada kya hai

un se wo wo ada nikalti hai

jo nahin jaante ada kya hai

mujh se puchho shab-e-firaq ka haal

jaanta hun ki ye bala kya hai

kya qayamat hai un se puchhta hun

nigah-e-chashm-e-fitna-za kya hai

abr uThae hai lo piyo ai 'lutf'

mai se tauba tumhein hua kya hai