aashiqi mein KHamushi mumkin hai na-mumkin nahin

āshiqī meñ ḳhāmushī mumkin hai nā-mumkin nahīñ

kyā karūñ mujh se to zabt-e-iltijā mumkin nahīñ

tālib-e-āzār ishq aur husn āsā.ish-pasand

tū bhī ho merā sharīk-e-mudda.ā mumkin nahīñ

maiñ jo miT jā.ūñ to badlūñ rañg-o-bū kā pairahan

ālam-e-ījād meñ merī fanā mumkin nahīñ

har jagah jalve tire merī nazar ke saath haiñ

maiñ pukārūñ tū na ho jalva-numā mumkin nahīñ

sāzish-e-dariyā-o-sāhil se to mumkin hai magar

mujh ko ye maujeñ Dubo deñ nā-ḳhudā mumkin nahīñ

jis nazar ko mere dard-e-dil kā bhī irfāñ na ho

vo nazar ho jaa.e ālam-āshnā mumkin nahīñ

aashiqi mein KHamushi mumkin hai na-mumkin nahin

kya karun mujh se to zabt-e-iltija mumkin nahin

talib-e-azar ishq aur husn aasaish-pasand

tu bhi ho mera sharik-e-muddaa mumkin nahin

main jo miT jaun to badlun rang-o-bu ka pairahan

aalam-e-ijad mein meri fana mumkin nahin

har jagah jalwe tere meri nazar ke sath hain

main pukarun tu na ho jalwa-numa mumkin nahin

sazish-e-dariya-o-sahil se to mumkin hai magar

mujh ko ye maujen Dubo den na-KHuda mumkin nahin

jis nazar ko mere dard-e-dil ka bhi irfan na ho

wo nazar ho jae aalam-ashna mumkin nahin