aashiqon ki bazm ho aur halqa-e-rindan bhi ho

āshiqoñ kī bazm ho aur halqa-e-rindāñ bhī ho

ma.arifat kā jaam ho aur bāda-e-īmāñ bhī ho

garche andāz-e-bayāñ to ḳhuub hai vaa.iz ke paas

haañ magar raḳht-e-safar meñ bā-amal sāmāñ bhī ho

is dil-e-betāb par kuchh to karam farmā.iye

justujū-e-yār ho aur dard kā darmāñ bhī ho

husn kā parvāna banñe ke liye ye shart hai

ātish-e-furqat meñ jalne kā tirā armāñ bhī hai

sar-zamīn-e-dil kā vaalī bhī to koī ho yahāñ

dil agar hai saltanat to dil kā ik sultāñ bhī ho

har maqām-e-zīst par aql-o-ḳhirad achchhī nahīñ

hosh-mandoñ ke liye 'usmāñ’ dil-e-nādāñ bhī ho

aashiqon ki bazm ho aur halqa-e-rindan bhi ho

marifat ka jam ho aur baada-e-iman bhi ho

garche andaz-e-bayan to KHub hai waiz ke pas

han magar raKHt-e-safar mein ba-amal saman bhi ho

is dil-e-betab par kuchh to karam farmaiye

justuju-e-yar ho aur dard ka darman bhi ho

husn ka parwana banne ke liye ye shart hai

aatish-e-furqat mein jalne ka tera arman bhi hai

sar-zamin-e-dil ka wali bhi to koi ho yahan

dil agar hai saltanat to dil ka ek sultan bhi ho

har maqam-e-zist par aql-o-KHirad achchhi nahin

hosh-mandon ke liye 'usman’ dil-e-nadan bhi ho