aashna jab apni hasti se bashar ho jaega

āshnā jab apnī hastī se bashar ho jā.egā

rāz-e-haq se bhī yaqīnan bā-ḳhabar ho jā.egā

dahr meñ hassās-fitrat jab bashar ho jā.egā

pattharoñ kā shahr shīshe kā nagar ho jā.egā

Dūbte sūraj pe āḳhir tabsira maiñ kyoñ karūñ

har charāġh-e-shām tanvīr-e-sahar ho jā.egā

jab sitāra jhilmilā.egā sahar kī god meñ

ḳhud na.ī hastī kā sūraj jalva-gar ho jā.egā

āgahī ne toḌ dī maazī kī dīvāreñ ḳhamosh

ab jo lamha aa.egā vo mo'tabar ho jā.egā

thā ba-qaul-e-'mīr' dillī ek shahr-e-intiḳhāb

kyā ḳhabar thī vo bhī ḳhvāboñ kā nagar ho jā.egā

jaise guzre shahr se dīvāna koī be-ḳhabar

ziist se 'jagdīsh' apnā yuuñ guzar ho jā.egā

aashna jab apni hasti se bashar ho jaega

raaz-e-haq se bhi yaqinan ba-KHabar ho jaega

dahr mein hassas-fitrat jab bashar ho jaega

pattharon ka shahr shishe ka nagar ho jaega

Dubte suraj pe aaKHir tabsira main kyon karun

har charagh-e-sham tanwir-e-sahar ho jaega

jab sitara jhilmilaega sahar ki god mein

KHud nai hasti ka suraj jalwa-gar ho jaega

aagahi ne toD di mazi ki diwaren KHamosh

ab jo lamha aaega wo mo'tabar ho jaega

tha ba-qaul-e-'mir' dilli ek shahr-e-intiKHab

kya KHabar thi wo bhi KHwabon ka nagar ho jaega

jaise guzre shahr se diwana koi be-KHabar

zist se 'jagdish' apna yun guzar ho jaega