aashna jab tak na the is jalwa-e-kaamil se hum

āshnā jab tak na the is jalva-e-kāmil se ham

haq se kosoñ duur the nazdīk the bātil se ham

husn-e-zan husn-e-adab husn-e-nazar husn-e-mazāq

aaj kyā kyā le chale haiñ husn kī mahfil se ham

ġharq karnā ho to kar de mauj-e-bahr be-kasī

kyā sahārā maañg leñ āsūda-e-sāhil se ham

but-parastī karte karte haq-parastī aa ga.ī

kaun sī manzil pe pahuñche kaun sī manzil se ham

rang o roġhan se 'musavvir' kuchh ġharaz rakhte nahīñ

khīñch lete haiñ shabīh-e-nāz ḳhūn-e-dil se ham

aashna jab tak na the is jalwa-e-kaamil se hum

haq se koson dur the nazdik the baatil se hum

husn-e-zan husn-e-adab husn-e-nazar husn-e-mazaq

aaj kya kya le chale hain husn ki mahfil se hum

gharq karna ho to kar de mauj-e-bahr be-kasi

kya sahaara mang len aasuda-e-sahil se hum

but-parasti karte karte haq-parasti aa gai

kaun si manzil pe pahunche kaun si manzil se hum

rang o roghan se 'musawwir' kuchh gharaz rakhte nahin

khinch lete hain shabih-e-naz KHun-e-dil se hum